ငရုတ်သီးစိမ်းရဲ့ကျန်းမာရေးကောင်းကျိုးများ

ဟင်းရဲ့အရောင်အဆင်း၊ အနံ့၊ အရသာပိုမိုထူးကဲကောင်းမွန်ဖို့အတွက် ငရုတ်သီးက အိမ်ရှင်မတိုင်းရဲ့လက်စွဲပါပဲ။ ငရုတ်သီးမှုန့်၊ ငရုတ်သီးမှည့်၊ ငရုတ်ချဉ်ရည်၊ ငရုတ်သီးစိမ်းစတာတွေ အမျိုးမျိုးရှိတဲ့အထဲကမှ ငရုတ်သီးစိမ်းက ဟင်းရဲ့အရသာကို ပိုမိုကောင်းမွန်စေပြီး ကျန်းမာရေးအတွက်လည်း အထောက်အကူပြုတာကို တွေ့ရပါတယ်။ အစားအသောက်ပျက်နေသူများနဲ့ နလန်ထခါစသူတွေအနေနဲ့ ခံတွင်းပျက်ချိန်မှာ ငရုတ်သီးစိမ်းကို စားသုံးပေးမယ်ဆိုရင် လျှာပေါ်ကအရသာခံဖုတွေကို နိုးဆွပေးသလိုဖြစ်စေတာကြောင့် အစာစားချင်စိတ်ကို ပြန်လည်ဖြစ်ပေါ်စေပါတယ်။ ဒါ့အပြင် ငရုတ်သီးစိမ်းရဲ့ ကျန်းမာရေးကောင်းကျိုးများကလည်း အံ့မခမ်းပါပဲနော်။ တန်ဆေးလွန်ဘေး ဆိုတဲ့အတိုင်း အလွန်အကျွံမစားသုံးမိဖို့ပဲ လိုပါတယ်။
(၁) ရောဂါပိုးမွှားများကိုခုခံနိုင်စွမ်းအားရှိပါတယ်
ခန္ဓာကိုယ်ကိုဒုက္ခပေးမယ့် ရောဂါပိုးမွှားများဝင်ရောက်မှုကို ခုခံပေးနိုင်တာကြောင့် သွေးဖြူဥအားကောင်းစေမယ့် အစားအသောက်များကို စားသုံးဖို့လိုပါတယ်။ ငရုတ်သီးစိမ်းမှာပါဝင်တဲ့ ဗီတာမင်စီဓာတ်က သွေးဖြူဥများကို အားကောင်းစေတာကြောင့် ရောဂါပိုးဝင်ရောက်မှုကို ဟန့်တားပေးနိုင်ပါတယ်။
(၂) အစာချေဖျက်မှုကောင်းမွန်စေပါတယ်
ငရုတ်သီးစိမ်းကိုဝါးစားလိုက်တဲ့အခါမှာ သွားရည်တွေထွက်လာပါတယ်။ ဒီသွားရည်တွေက အစာချေဖျက်စနစ်ကို ကောင်းမွန်စေပြီး အစာကြေလွယ်စေပါတယ်။
(၃) သံဓာတ်အားဖြည့်ပေးပါတယ်
ခန္ဓာကိုယ်တွင်းက ဗီတာမင်စီဓာတ်ပြည့်ဝနေမှ အစာအာဟာရများကို စုပ်ယူနိုင်စွမ်းရှိတာပါ။ ငရုတ်သီးစိမ်းက ဗီတာမင်ဓာတ်ပြည့်ဝတဲ့အတွက်ကြောင့် အစာအာဟာရစုပ်ယူနိုင်ဖို့နဲ့ သံဓာတ်အားကောင်းစေဖို့ အထောက်အပံ့ဖြစ်စေပါတယ်။
(၄) ဝိတ်ကျစေပါတယ်
ခန္ဓာကိုယ်တွက်ဆိုးကျိုးဖြစ်စေမယ့် အဆီပိုများကို ဖယ်ရှားပေးနိုင်ပြီး ကယ်လိုရီလောင်ကျွမ်းစေပါတယ်။ ဝိတ်ချနေသူများအနေနဲ့ diet plan ထဲမှာ ငရုတ်သီးစိမ်းကို ထည့်သွင်းစားသုံးသင့်ပါတယ်နော်။
(၅) ဝမ်းမှန်စေပါတယ်
ငရုတ်သီးစိမ်းမှာပါဝင်တဲ့ အမျှင်ဓာတ်က ဝမ်းချုပ်သူများအတွက် သင့်လျော်ပါတယ်။ ဝမ်းမှန်စေပြီး အူလမ်းကြောင်းကို သန့်ရှင်းစေတာကြောင့် ငရုတ်သီးစိမ်းက တကယ့်ကိုကျန်းမာရေးအတွက် အထောက်အကူပြုတာ တွေ့ရမှာပါနော်။
(၆) ဆီးချိုရောဂါကာကွယ်ပေးပါတယ်
ငရုတ်သီးစိမ်းက ခန္ဓာကိုယ်ကိုဒုက္ခပေးမယ့် သကြားဓာတ်၊ ကိုလက်စထရောကို လျော့ချပေးနိုင်တာကြောင့် ဆီးချို၊ သွေးချိုရောဂါဖြစ်ခြင်းမှ ကာကွယ်ပေးပါတယ်။ ဒါ့အပြင် ခန္ဓာကိုယ်တွင်းက လိုအပ်တဲ့သကြားဓာတ်ကိုလည်း ထိန်းညှိပေးနိုင်တာကြောင့် ဆီးချိုသမားများ ငရုတ်သီးစိမ်းကို စားသုံးပေးသင့်ပါတယ်။
(၇) အဖျားပိုးကိုတွန်းလှန်ပေးပါတယ်
ပိုးမွှားများကို တွန်းလှန်နိုင်တဲ့ အကျိုးကျေးဇူးများစွာပါဝင်တာကလည်း ငရုတ်သီးစိမ်းပါပဲ။ ကိုယ်ခံအားနည်းချိန်မှာ အဖျားပိုးအလွယ်တကူဝင်ရောက်မှုကို ဟန့်တားပေးနိုင်ဖို့အတွက် ငရုတ်သီးစိမ်းကို စားသုံးပေးသင့်ပါတယ်နော်။
(၈) စိတ်ဖိစီးမှုလျော့ပါးစေပါတယ်
စိတ်ဓာတ်ကျခြင်း၊ စိတ်ဖိစီးမှုများခြင်းနဲ့ စိတ်ညစ်သူများအနေနဲ့ ငရုတ်သီးစိမ်းပါဝင်တဲ့ အစားအစာကို စားသုံးပေးဖို့ လိုပါတယ်။ ငရုတ်သီးစိမ်းက ဟော်မုန်းဓာတ်ကို ထိန်းညှိပေးနိုင်ပါတယ်။
(၉) အသားအရေလှပစေပါတယ်
အသားအရေစိုပြည်လှပစေဖို့ လိုအပ်တဲ့ပရိုတိန်းဓာတ်များကို ငရုတ်သီးစိမ်းက ပေးစွမ်းနိုင်ပါတယ်။ ငရုတ်သီးစိမ်းမှာပါဝင်တဲ့ ပရိုတိန်းဓာတ်များနဲ့ ဗီတာမင်စီဓာတ်က အသားအရေလှပဖို့အတွက် များစွာအထောက်အကူဖြစ်စေတာကို တွေ့ရပါတယ်။
(၁၀) ဆံပင်သန်စေပါတယ်
ငရုတ်သီးစိမ်းက ခန္ဓာကိုယ်တွင်းဖြစ်စဉ်များကို ပုံမှန်အတိုင်းလည်ပတ်စေပြီး သွေးလည်ပတ်မှုကို ကောင်းမွန်စေပါတယ်။ ဒါ့အပြင် ဦးရေပြားတစ်ဝိုက်ကိုလည်း သွေးလည်ပတ်မှု ကောင်းမွန်စေတာကြောင့် ဆံပင်သန်စေပါတယ်။

နန်း(ရွှေအင်းလေး)

Be the first to comment

Leave a Reply

Your email address will not be published.


*