နှစ်စဉ်ပြုလုပ်သည့် Samsung Love and Care အစီအစဉ်ကို ကြည့်မြင်တိုင်မျက်မမြင်ကျောင်းတွင်ကျင်းပ

၂၀၁၅ ခုနှစ် မှ စပြုကာ နှစ်စဉ်ပြုလုပ်လျက်ရှိသည့် တစ်ကမ္ဘာလုံး ဆိုင်ရာလုပ်အားပေးပွဲတော် Samsung Global Volunteer Festival ၏ တစ်စိတ်တစ်ပိုင်းဖြစ်သည့် Samsung Love and Care အစီအစဉ်အား ရန်ကုန်တိုင်းဒေသကြီး၊ ကြည့်မြင်တိုင်မြို့နယ်ရှိ လူမှုဝန်ထမ်းဦးစီးဌာနအောက်ရှိ မျက်မမြင်ကျောင်း၌ ယခုနှစ်တွင် ပြုလုပ်ကျင်းပခဲ့သည်။

၁၉၉၅ ခုနှစ်မှ စတင်ကာ Global Volunteer Festival ဟု အမည်တွင်သည့် Samsung ၀န်ထမ်းများအား ဒေသဆိုင်ရာ အဖွဲ့အစည်းများ ကြုံတွေ့နေရသည့် အခက်အခဲ ပြဿနာများအား အဓိက ရည်ရွယ်ပြီး နိုင်ငံသားဆိုင်ရာ လှုပ်ရှားမှုများအား အချိန်ပေး၍ လုပ်အားပေးကူညီရန် တိုက်တွန်းသည့် အနေဖြင့် ကမ္ဘာလုံးဆိုင်ရာ လုပ်အားပေး ဆောင်ရွက်မှုပွဲတော်အဖြစ် သတ်မှတ်၍ စီစဉ်ကျင်းပခဲ့ခြင်းဖြစ်သည်။ ၄င်းအစီအစဉ်အား နှစ်စဉ်နှစ်တိုင်း အောက်တိုဘာလတွင် ကျင်းပလေ့ရှိပြီး ကမ္ဘာတစ်ဝှမ်းမှ Samsung ၀န်ထမ်းများသည် ၎င်းတို့ အလုပ်လုပ်ကိုင်ရာ နှင့် နေထိုင်ရာပတ်ဝန်းကျင်တွင် ရှိသော လူမှုအဖွဲ့အစည်းများနှင့် ပတ်ဝန်းကျင်အား ကောင်းမွန်သည့် အကျိုးသက်ရောက်မှုများ ရရှိစေရန်အတွက် ကိုယ်ပိုင်အချိန်များနှင့် စွမ်းဆောင်ရည်များကို တီထွင်ဖန်တီးအသုံးပြု၍ ပံ့ပိုးလှူဒါန်းကြလေ့ရှိကြသည်။

ယခုနှစ်တွင် ကျင်းပပြုလုပ်သည့် Samsung Love and Care အစီအစဉ်တွင်လည်း Samsung Myanmar ၏ ၀န်ထမ်းများသည် ရန်ကုန်မြို့ လူမှုဝန်ထမ်းဦးစီးဌာနအောက်ရှိ ကြည့်မြင်တိုင် မျက်မမြင်ကျောင်းမှ ကျောင်းသား၊ ကျောင်းသူကလေးငယ်များအား နေ့လည်စာကျွေးမွေးခြင်း၊ တစ်ကိုယ်ရည် ကျန်းမာရေး စစ်ဆေးပေးခြင်းနှင့် လိုအပ်သည့် ဆေးဝါးများလှူဒါန်းခြင်း၊ ပန်းချီဆွဲခြင်းနှင့် အခြားလေ့လာသင်ကြားမှုများကို ပြုလုပ်ခဲ့ကြသည်။ ထို့အပြင် Samsung Myanmar မှ ကျောင်းသား၊ ကျောင်းသူများ အသုံးပြုရန်အတွက် မျက်မမြင်သုံးလက်စမ်းစာရွက် (Braille sheet)နှင့် အခြား သင်ကြားရေး အထောက်အကူပြုပစ္စည်းများ၊  Samsung TV၊ တစ်ကိုယ်ရည်သုံးပစ္စည်းများနှင့် ဆန်အိတ်မျာလည်း လှူဒါန်းခဲ့သည်။

“Samsung ရဲ့ နှစ်စဉ် Global Volunteer Festival ရဲ့ တစ်စိတ်တစ်ပိုင်းအနေနဲ့ ပြုလုပ်တဲ့ ဒီ Love and Care အစီအစဉ်မှာ  Samsung Myanmar ရဲ့ မိသားစုဝင်တွေနဲ့အတူတူ နှစ်စဉ်ပျော်ပျော်ရွှင်ရွှင် ပါဝင်လုပ်အားပေးရတဲ့အတွက် ဂုဏ်ယူဝမ်းမြောက်မိပါတယ်။ ကျွန်တော်တို့ Samsung အနေနဲ့ စီးပွားရေးဆိုင်ရာ အောင်မြင်မှုများရရှိအောင် တစိုက်မတ်မတ်ကြိုးစားနေရုံသာမက လူမှုအသိုင်းအ၀ိုင်းကိုလည်း ပြန်လည်အကျိုးပြုဖို့ အမြဲ စိတ်အားထက်သန်ပါတယ်။ အခုလို မြန်မာနိုင်ငံရဲ့ လူမှုအသိုင်းအ၀န်း အဖွဲ့အစည်းတွေအကြား ပိုမိုကောင်းမွန်တဲ့ ပြောင်းလဲမှုတွေကို ယူဆောင်လာပေးချင်တဲ့ Love and Care အစီအစဉ်ကို နှစ်စဉ်အောင်အောင်မြင်မြင်ကျင်းပနိုင်တဲ့အတွက်လည်း ၀မ်းသာပီတိ ဖြစ်ရပါတယ်။” ဟု Samsung Myanmar ၏ မန်နေးဂျင်းဒါရိုက်တာဖြစ်သူ Mr. YoungSeok Ham မှ ပြောကြားခဲ့သည်။

လူမှုဝန်ထမ်းဦးစီးဌာနအောက်ရှိ ကြည့်မြင်တိုင် မျက်မမြင်ကျောင်းသည် မျက်မမြင် ကျောင်းသူ၊ကျောင်းသားများ အား အတန်းပညာသာမက ကျောင်းအတွင်း စာသင်ခန်း၊ စာဖတ်ခန်း၊ ထမင်းစားခန်းနှင့်အဆောင် စသည့် နေရာများတွင်သာမက ပြင်ပနေရာများတွင်ပါ လမ်းလျှောက်တုတ်ဖြင့် အဆင်ပြေစွာ သွားလာနိုင်ရန် လေ့ကျင့်သင်ကြားပေးလျက်ရှိသည်။ ကြည့်မြင်တိုင်မျက်မမြင်ကျောင်းအား ၁၉၁၄ ခုနှစ်တွင် ခရစ်ယာန်သာသနာပြု အဖွဲ့များမှ စတင်တည်ထောင်ခဲ့ပြီး လူမှုဝန်ထမ်းဦးစီးဌာနမှ ၁၉၆၃ ခုနှစ်မှ စတင်ကာ လက်ရှိအချိန်အထိ တာဝန်ယူစီမံပံ့ပိုးလျက်ရှိသည်။ လက်ရှိအချိန်တွင် ကျောင်းသူ၊ကျောင်းသား စုစုပေါင်း (၁၉၀) ဦး တက်ရောက်သင်ကြားလျက်ရှိသည်။

Samsung Myanmar ၏ လှုဒါန်းမှုနှင့် ပတ်သက်ပြီး  ကြည့်မြင်တိုင် မျက်မမြင်ကျောင်း၏ ကျောင်းအုပ်ဆရာမကြီးဖြစ်သူ ဒေါ်ခင်ညိုထွန်းမှ “အခုလို Samsung Myanmar ကနေပြီးတော့ လိုအပ်တဲ့ လှုဒါန်းမှုတွေပြုလုပ်ခဲ့တဲ့ အပြင် ကလေးတွေရဲ့ ကျန်းမာရေးတွေ ကို စစ်ဆေးပေးပြီး သူတို့တွေအတွက် နေ့လည်စာတွေ၊ လက်ဆောင်တွေ လာရောက် ပေးအပ်တာ အရမ်းကို ကောင်းမွန်တဲ့ လုပ်ရပ်တစ်ခုဖြစ်ပါတယ်။ ကျောင်းသူ၊ ကျောင်းသားတွေ အရမ်းပျော်ရွှင်ရတာ မြင်ရတော့ ကျွန်မလည်း အရမ်းဝမ်းသာပီတိဖြစ်ရပါတယ်။ အခုလိုမျိုး အချိန်ပေး လာရောက်လှုဒါန်းတဲ့ Samsung Myanmar လည်း နောက်ထပ်ပိုပြီး လူမှုအကျိုးပြုလုပ်ငန်းတွေ လုပ်ဆောင်နိုင်ပါစေ။” ဟု ပြောကြားခဲ့သည်။

Samsung Myanmar သည် ပထမဦးဆုံး Love and Care အစီအစဉ်ကို ၂၀၁၅ ခုနှစ်တွင် ပဲခူးမြို့အနီးရှိ ပန်းပျိုးလက်ဘုန်းတော်ကြီးသင်ပညာရေးကျောင်းတွင်လည်းကောင်း၊ ၂၀၁၆ ခုနှစ်တွင် မြန်မာနိုင်ငံမသန်စွမ်းကွန်ယက် နှင့်ပူးပေါင်းပြီး အပြည်ပြည်ဆိုင်ရာမသန်စွမ်းသူများနေ့ကို ရန်ကုန်မြို့ ပြည်သူ့ရင်ပြင်တွင်လည်းကောင်း၊ ၂၀၁၇ ခုနှစ်တွင် ဒဂုံမြို့သစ် ဆိပ်ကမ်းမြို့နယ် (၇၈) ရပ်ကွက် တွင် တည်ရှိသည့် အောင်မြေဘုန်းတော်ကြီးသင် ပညာသင်ကျောင်းတွင်လည်းကောင်း စီစဉ်ကျင်းပခဲ့သည်။

YOU MAY ALSO LIKE

Be the first to comment

Leave a Reply

Your email address will not be published.


*