Latest post

ကောင်လေးတွေ သူတို့ကောင်မလေးအပေါ် စိတ်ပျက်သွားရတဲ့အကြောင်းအရင်း

ကိုယ့်ရဲ့ချစ်သူနဲ့ စိတ်သဘောထားချင်းမတိုက်ဆိုင်လို့ စကားအချေအတင်များတဲ့ အခါမျိုးမှာ မိန်းကလေးတွေ အနေနဲ့ ရှောင်ကြဉ်သင့်တဲ့ စကားလုံးတွေ ရှိနေပါတယ်။ အနှစ်နှစ်အလလ တည်ဆောင်ခဲ့တဲ့ Relatioship က စကားတစ်ခွန်းတည်းနဲ့ စက္ကန့်ပိုင်း၊ မိနစ်ပိုင်းအတွင်းကို ပျက်စီးသွားနိုင်တာကြောင့် ဘယ်လောက်ပဲ စိတ်ဆိုး၊ စိတ်ကောက်နေပါစေ၊ ကိုယ့်ရဲ့ချစ်သူ ကောင်လေးကို လုံးဝမပြောသင့်တဲ့စကားတွေပါ။ စိတ်အားငယ်သွားပြီး သင့်ကိုစိတ်ပျက်သွားစေ နိုင်တဲ့အတွက် ဘယ်လိုစကားလုံးတွေကို ရှောင်ကြဉ်သင့်လဲဆိုတာကို ဖော်ပြပေးလိုက်ပါတယ်။

(၁) အကြောင်းမဲ့သက်သက် သဝန်တိုနေတယ်

ချစ်ပြီဆိုကတည်းကိုက သဝန်တိုတဲ့စိတ်ကတော့ ပါလာတာပါပဲ။ သင့်ကိုအထင်လွဲပြီး သဝန်တိုတာပဲဖြစ်ဖြစ်၊ ယောက်ျားလေးသူငယ်ချင်းနဲ့ သဝန်တိုနေတာမျိုးဆိုရင် သင့်ဘက်က ခပ်ထန်ထန် မတုန့်ပြန်သင့်ပါဘူး။ အကြောင်းမဲ့သက်သက် သဝန်တိုနေတာပဲ၊ မယုံဘူးလား စသဖြင့် Negative ဆန်တဲ့ စကားလုံးတွေက သင့်ရဲ့ချစ်သူကို စိတ်ပျက်သွားစေနိုင်ပါတယ်။ ဒါ့ကြောင့် သဝန်တိုတတ်တဲ့ ချစ်သူကို အကျိုးသင့်အကြောင်းသင့် ရှင်းပြမယ်၊ သေချာချော့ပြောမယ်ဆိုရင်တော့ နှစ်ဦးနှစ်ဖက် အချစ်ရေး ခိုင်မြဲစေမှာပါ။

(၂) ဒါလေးတောင် မလုပ်နိုင်ဘူးလား

အခက်အခဲတွေ ရင်ဆိုင်ကြုံတွေ့လာရတဲ့ အခါမျိုးမှာ ချစ်တဲ့သူ အနားမှာရှိနေပေးတာက အားပိုရှိစေပါတယ်။ ချစ်သူကောင်လေး စိတ်ဓာတ်ကျချိန်မှာ သင်က အားပေးစကား ဆိုတဲ့အခါမှာ ဒါလေးတောင်မလုပ်နိုင်ဘူးလား၊ ငါမကူညီရင် မလုပ်တတ်တော့ဘူးလား စသဖြင့် မပြောဆိုသင့်ပါဘူး။ သင့်ဆီက နှစ်သိမ့်စကားတောင့်တနေတဲ့ အချိန်မှာ ဒီလိုသွားပြောမိရင် သူ့အနေနဲ့ သင့်အပေါ် စိတ်ပျက်အားငယ်သွားစေနိုင်တဲ့ အတွက်ကြောင့်ပါ။

(၃) ယောက်ျားပီသစမ်းပါ

ယောက်ျားလေးဆိုတော့ အမြဲတမ်းကျားကျားလျားလျား ဖြစ်နေရပြီးတော့ မငိုရတော့ဘူးလား။ သူတို့မှာလည်း ကြင်နာတတ်တဲ့ နှလုံးသားရှိတဲ့အတွက် ဝမ်းနည်းခံစားတတ်ပါတယ်။ ငိုကြွေးတတ်ပါတယ်။ ဒီလို ဝမ်းနည်းမှုတွေ ကြုံတွေလာတဲ့အခါမှာ ယောက်ျားပီသစမ်းပါ၊ ယောက်ျားမဟုတ်ဘူးလား လို့ သွားမပြောသင့်ပါဘူး။

(၄) ပြောနေတာသဘောမပေါက်ဘူးလား

ဒါလေးတောင် မသိဘူးလား၊ ပြောပြနေတာ နားမလည်ဘူးလား စတဲ့စကားလုံးတွေကလည်း သူ့ကို သိမ်ငယ်သွားစေနိုင်ပါတယ်။ ယောက်ျားတစ်ယောက်ဖြစ်နေတဲ့အတွက် သူချစ်ရတဲ့ မိန်းကလေးရှေ့မှာ အကောင်းဆုံး၊ အတော်ဆုံး ယောက်ျားတစ်ယောက်ဖြစ်ချင်ကြတာ တွေချည်းပါပဲ။ မိန်းကလေးထက်ပိုတော်ချင် ကြတာတွေပါပဲ။ သင့်ထက်ခြေတစ်လှမ်း နောက်ကျနေရင်တောင်မှ လက်တွဲခေါ်ယူသင့်တာပါ။

(၅) ငါ့ယောက်ျားလေးသူငယ်ချင်းတစ်ယောက်ဆိုရင်အရမ်းတော်တယ်

သင့်ချစ်သူကို တခြားကောင်လေးနဲ့ ဘယ်တော့မှ နှိုင်းယှဉ်ပြီး မပြောမိပါစေနဲ့။ နှိုင်းယှဉ်ပြီး ပြောဆိုတာ၊ နှိမ့်ချတာတွေက သင့်ချစ်သူသိက္ခာကိုလည်း ထိခိုက်စေနိုင်သလို၊ စိတ်ဓာတ်ကျသွားစေနိုင်လို့ ကြာလာတဲ့အခါမှာ သင့်ကိုစိတ်ပျက်သွားနိုင်ပါတယ်။ ဒါ့ကြောင့် သင့်ဆီမှာ ဘယ်လောက်ပဲ တော်နေတတ်နေတဲ့ ယောကျာ်းလေးသူငယ်ချင်းတွေ အမျာကြီးရှိနေလည်းပဲ သူတို့အကြောင်းကို နှိုင်းယှဉ်ပြီး မပြောဆိုသင့်ပါဘူး။

နန်း(ရွှေအင်းလေး)

Be the first to comment

Leave a Reply

Your email address will not be published.


*