ရည်းစားဟောင်းဆီ ပြန်သွားတော့မယ်ဆိုရင်…

တစ်ဦးနဲ့တစ်ဦး အရမ်းချစ်ပါလျက်နဲ့ မထင်မှတ်တဲ့ အကြောင်းကိစ္စတစ်ခုခုကြောင့် လမ်းခွဲရတာမျိုး အများကြီးတွေ့နေရပါတယ်။ ကိုယ်အရမ်းချစ်ရတဲ့ သူတစ်ယောက်ကို လွယ်လွယ်မေ့ပစ်လိုက်ဖို့ဆိုတာ လွယ်တဲ့ကိစ္စတော့ မဟုတ်ပါဘူး။ စိတ်ရော၊ လူရောမကပ်တော့ဘဲ အမြဲတမ်းတမိနေတာမျိုး ဖြစ်နေတယ်ဆိုရင်တော့ သူ့ဆီကိုပြန်သွားဖို့ နည်းလမ်းလေးတွေကို ပြောပြချင်ပါတယ်။

(၁) ဖုန်းနဲ့ အဆက်အသွယ်လုပ်ပါ

သင်ကတော့ စားမရ၊ အိပ်မရနဲ့ ရည်းစားဟောင်းကို သတိရနေပေမယ့် သူ့ဘက်ကရော သင့်အပေါ်ထားတဲ့အချစ်စိတ်က ရှိနေသေးလားဆိုတာကို စမ်းသပ်ကြည့်ဖို့တော့ လိုပါမယ်။ ဒါ့ကြောင့် လူကိုယ်တိုင်မတွေ့ရင်တောင် ဖုန်းနဲ့ အဆက်အသွယ်လုပ်ကြည့်ပါ။ ပထမဦးဆုံး မက်ဆေ့ခ်ျပို့လိုက်ပါ။ နောက်တစ်ဆင့်အနေနဲ့ ရံဖန်ရံခါ ဖုန်းဆက်ပါ။ သူ့ဘက်က သံယောဇဉ်လက်ကျန် ရှိသေးတယ်ဆိုရင်တော့ သင့်ရဲ့မက်ဆေ့ခ်ျ၊ ဖုန်းကို လက်ခံစကားပြောပါလိ့မ်မယ်။ ဒီနည်းလမ်းကတစ်ဆင့် သင့်ရဲ့ချစ်သူဟောင်းထံကို ဖြေးဖြေးချင်း ချဉ်းကပ်သွားလို့ရပါတယ်။

(၂) အချိန်ယူစဉ်းစားပါ

တကယ်လို့ သင်တို့နှစ်ဦးက သဘောထားခြင်းမတိုက်ဆိုင်လို့ လမ်းခွဲလိုက်တာဆိုရင်တော့ ဘယ်လောက်ပဲ သတိရနေပါစေ၊ သူ့ဆီပြန်သွားဖို့ကို အချိန်ယူစဉ်းစားဖို့ လိုပါတယ်။ အလျင်စလို ဆုံးဖြတ်ချက်မချသေးဘဲ သူ့ဆီပြန်သွားသင့်လား၊ ပြန်တွဲရင်လည်း ဘာတွေဆက်ဖြစ်လာနိုင်လဲ၊ အခြေအနေ ထူးခြားမှု ရှိလာပါ့မလားဆိုတာကို အချိန်ယူစဉ်းစားသင့်ပါတယ်။ ဖြေရှင်းရမယ့်နည်းလမ်း ကိုအချိန်ယူမစဉ်းစားဘဲနဲ့ ဘာကိစ္စကိုမှ အလောတကြီး ဆုံးဖြတ်ချက်မချလိုက်ပါနဲ့။

(၃) အမှားများကိုတောင်းပန်ဖို့ဝန်မလေးပါနဲ့

နှစ်ယောက်ကြားက ပြဿနာကို အရင်ဦးဆုံးဖြေရှင်းပြီးမှ ပြန်တွဲဖို့ အဆင်ပြေမှာပါ။ ဒါ့ကြောင့် သူနဲ့ ကိုယ့်ကြားက ဖြစ်ခဲ့တဲ့ ပြဿနာရပ်တွေကို အမှန်တရားထွက်ပေါ်လာတဲ့ထိ ဆန်းစစ်ပါ။ သင့်ဘက်က မှားနေရင်လည်း တောင်းပန်ဖို့ ဝန်မလေးပါနဲ့။ ကိုယ်ချစ်တဲ့သူအပေါ် မာန၊ အတ္တထားတာကလည်း ဝေးရခြင်းရဲ့ လမ်းစပါပဲ။ ဒါ့ကြောင့် သူ့ဘက်က ချက်ချင်းခွင့်လွှတ်ပေးသည်ဖြစ်စေ၊ မခွင့်လွှတ်ပေးဘူး ဖြစ်စေ သင့်အမှားကို ဝန်ချတောင်းပန်ပြီးမှ သူ့ဆီပြန်သွားဖို့ ကြိုးပမ်းသင့်ပါတယ်။

(၄) အတူကြည်နူးခဲ့တဲ့ အကြောင်းများကိုပြန်ပြောပါ

ရည်းစားဟောင်းနဲ့ ပြန်လည်သင့်မြတ်ဖို့ ဆိုရင်တော့ အရင်အတိတ်က ဖြစ်ပျက်ခဲ့တဲ့ ဝမ်းနည်းစရာ၊ နာကျင်စရာနေ့ရက်တွေကို မေ့ပစ်ဖို့ လိုပါတယ်။ ဖြစ်နိုင်ရင် သူနဲ့ အမှတ်တရဖြစ်ခဲ့တဲ့ ကိစ္စတွေ၊ ကြည်နူးစရာ အကြောင်းများကို သူ့ဖက်က ပြန်သတိရလာအောင် မကြာခဏပြောပေးပါ။ ပျော်ပါးခဲ့တဲ့ နေ့ရက်တွေကို ပြန်လည်တမ်းတအောင် ပြောဆိုပါ။

နန်း(ရွှေအင်းလေး)

Be the first to comment

Leave a Reply

Your email address will not be published.


*